ചീര വർഗ്ഗത്തിൽ പെട്ട പുതിയ സസ്യത്തെ പശ്ചിമഘട്ടത്തിൽ നിന്ന് കണ്ടെത്തി. കുളത്തുപ്പുഴ വനമേഖലയിൽ നിന്നാണ് കാസർകോട് ഗവ. കോളേജിലെ ബോട്ടണി വിഭാഗം മേധാവി ഡോ. വി എസ്. അനിൽകുമാർ , യൂണിവേഴ്സിറ്റി കോളേജ് ബോട്ടണി വിഭാഗം ഗവേഷണ വിദ്യാർത്ഥിനി എസ്. ആര്യയും ചേർന്നാണ് ഈ സസ്യത്തെ ആദ്യം കണ്ടെത്തിയത്.
റിജനൽ കാൻസർ സെന്ററിലെ ഗവേഷണ വിദ്യാർത്ഥി കെ.വിഷ്ണുവൽസൻ, മഞ്ചേരി എൻഎസ്എസ് കോളേജ് ബോട്ടണി വിഭാഗം അധ്യാപകൻ ടി.രാജേഷ്കുമാർ എന്നിവരും ഗവേഷണത്തിൽ പങ്കാളികളായിരുന്നു. കേരളത്തിലെ മറ്റു പല ജില്ലകളിൽ നിന്നും ഈ സസ്യത്തെ പിന്നീട് കണ്ടെത്തിയിട്ടുണ്ട് . 'അമരാന്തസ് അമരാന്തസ് ശാരദിയാന’ എന്നാണു പുതിയ സസ്യത്തിനു ഗവേഷകർ നൽകിയ ശാസ്ത്രീയ നാമം. അനിൽകുമാറിന്റെ അമ്മ ശാരദയുടെ സ്മരണാർത്ഥമാണ് ഈ പേര് നൽകിയത്.
ഗവേഷകരുടെ കണ്ടെത്തൽ ന്യൂസിലാൻഡിൽ നിന്ന് പ്രസിദ്ധീകരിക്കുന്ന സസ്യവർഗ്ഗീകരണ ശാഖയിലെ പ്രമുഖ രാജ്യാന്തര പ്രസിദ്ധീകരമായ 'ഫൈറ്റോ ടാക്സ' യുടെ പുതിയ ലക്കത്തിൽ പ്രസിദ്ധീകരിച്ചു.കേരളത്തിൽ ചീരയിനത്തിൽ പെട്ട ഏതാണ്ട് 13 ൽ പരം സസ്യങ്ങളുണ്ട് . പുതിയ ചീരയിനം കേരളത്തിൽ നിന്ന് റിപ്പോർട്ട് ചെയ്യുന്നത് നടാടെയാണ് .